नानुमैयाको ‘खुल्ला आकाशमुनि’ विमोचन

विराटनगर । विराटनगरकी साहित्यकार नानुमैया दाहालको ‘खुल्ला आकाशमुनि’ मुक्तकसंग्रहको विमोचन भएको छ । नेपाल मुक्तक प्रतिष्ठान कोशी प्रदेशले विराटनगरमा आयोजना गरेको कार्यक्रममा दाहालको रचना विमोचन भएको हो ।

नेपाल प्रज्ञा प्रतिष्ठानका सदस्यसचिव डा। धनप्रसाद सुवेदी, पूर्वाञ्चल साहित्य प्रतिष्ठानका अध्यक्ष विवश पोखरेल, चेतना संरक्षण प्रतिष्ठानकी अध्यक्ष गंगा सुवेदी,गीतकार रमेश पौडेल, विराट साहित्य संगमका अध्यक्ष मधु पोखरेल, आयोजक संस्थाका अध्यक्ष बाबुराम पोखरेललगायतले संयुक्त रुपमा खुल्ला आकाशमुनि बिमोचन गरेका हुन् ।

प्रगतिशील लेखक दाहालको मुक्तकसंग्रहमाथि समालोचक हरि कट्टेलले समीक्षा गरेका थिए ।मुक्तकसंग्रहले राजनैतिक, सामाजिक, आर्थिक, पारिवारिक विषयवस्तुलाई सशक्त रुपमा प्रस्तुत गरेको उनले बताए । संग्रह पठनीय र संग्रहनीय भएको चर्चा गरे ।

मुक्तक प्रतिष्ठान कोशी प्रदेशले प्रकाशित गरेको संग्रहमा दाहालका १५२ वटा मुक्तक समावेश छन् । पुस्तक विमोचन गर्दै प्रमुख अतिथिसमेत रहेका प्राज्ञ डा‍. धनप्रसाद सुवेदीले खुल्ला आकाशमुनिले नेपाली मुक्तक विधाको विकासमा योगदान गर्ने बताए ।

विमोचनका क्रममा साहित्यकार तीला लेकाली, विनोद विवश, रोहिणी रसिक, मञ्जु घिमिरे दाहाल, स्वीकृति रेग्मी, लक्ष्मी रायमाझी, मञ्जुश्री गिरी, प्रिन्स प्रमोदकुमार ढकाल, मदन भण्डारीलगायतले विमोचन भएको संग्रहभित्रका मुक्तक वाचन गरेका थिए ।