कोशी ब्यारेजः सबै ढोका खोलियो, दाउरा निकाल्न रोक

विराटनगर । कोशी ब्यारेजमा पानीको बहाब बढेपछि स्थानीय प्रशासनले दाउरा निकाल्न र माछा मार्न रोक लगाएको छ ।

बाढीको बहाब उच्च भएका कारण नदीमा दाउरा निकाल्न र माछा मार्न रोक लगाइएको सुनसरीका प्रहरी उपरीक्षक विपिन रेग्मीले जानकारी दिए । उनका अनुसार आइतबार साढे ३ बजे मापन गर्दा ३ लाख ९५ हजार क्युसेक मापन भएको छ ।

पानीको बहाव बढेपछि ५६ वटै ढोका खुल्ला गरिएको छ । नेपाल तर्फ बाढीले क्षति पुर्याएको छैन । तर भारतको विहारमा कोशी नदी किनार आसपासको बस्तीमा बाढी पसेको छ ।

कोशी ब्यारेजमा बिहान ९ बजे ३ लाख ७० हजार क्युसेक पानीको बहाव मापन भएको थियो । ११ बजे ३ लाख ७५ हजार, १ बजे ३ लाख ८६ हजार र साढे ३ बजे ३ लाख ९५ हजार क्युसेक मापन भएको छ । यो बहाब निरन्तर बढ्ने क्रममा रहेकाले प्रहरीले उच्च सतर्कता अपनाएको रेग्मीले बताए । उनले नदी किनारका बासिन्दालाई पनि शतर्कता अपनाउन आग्रह गरिएकाे बताए ।