कोशी ब्यारेजको सबै ढोका खोलियो

विराटनगर । सप्तकोशी नदी ब्यारेजका सबै ढोका खोलिएको छ। निरन्तरको वर्षाका कारण पानीको बहाव  उच्च भएपछि आज विहानबाट सबै ढोका खोलिएको हो ।

भारतको पूर्ण नियन्त्रणमा रहेको ब्यारेजमा ५६ वटा ढोका छन् । आज बिहान ९ बजेको मापनपछि ५६ वटै ढोका खोलिएको जिल्ला प्रहरी कार्यालय सुनसरीका प्रहरी नायव उपरीक्षक नविनकृष्ण भण्डारीले जानकारी दिए ।

उनका अनुसार आज विहान ९ बजेपछि ३ लाख ७० हजार क्युसेक पानीको बहाव मापन भएको छ । पूर्वी पहाडी जिल्लामा निरन्तर वर्षा भएपछि सप्तकोशीमा पानीको बहाब उच्च भएपछि सबै ढोका खोलिएको हो ।

सप्तकोशीमा प्रतिसेकेन्ड एक लाख ५० हजार क्युसेक पानीको बहब पुगेपछि खतरा मानिन्छ। सप्तकोशी नदीको बाढीले खतराको संकेत पार गरेपछि स्थानीय प्रशासनले नदी किनारका बासिन्दालाई सतर्क रहन आग्रह गरेको छ ।

२०११ साल वैशाख १५ गते नेपाल र भारतबीच भएको कोशी योजना सम्बन्धी सम्झौता अनुसार बनेको कोशी ब्यारेजले ९ लाख क्युसेक पानीको चाप थाम्न सक्ने क्षमता थियो । तर बाढीसँगै आउँने ढुंगा र बालुवाले बाध भन्दा माथिको भाग पुरेको छ। ब्यारेजमाथिकाे बालुका  बगाउनका लागि पनि भारतीय पक्षले कहिलेकाही सबै ढोका खोल्छ ।