प्रधानमन्त्री प्रचण्डले शुक्रबार विश्वासको मत लिने

काठमाडौं । नेकपा एमालेले समर्थन फिर्ता लिएपछि अल्पमतमा परेका प्रधानमन्त्री पुष्पकमल दाहाल प्रचण्डले २८ असारमा विश्वासको मत लिने भएका छन् । उनले संघीय संसदका महासचिवलाई पत्र लेखेर २८ असार शुक्बार विश्वासको मत लिने कार्यसूची राख्न आग्रह गरेका हुन् ।

संसदको दुई ठूला दल नेपाली कांग्रेस र एमालेबीच केपी शर्मा ओलीको नेतृत्वमा नयाँ सरकार गठन गर्ने सहमति भइसकेको छ ।

आफ्नो नेतृत्वमा राष्ट्रिय सहमतिको सरकार निर्माण गर्ने भन्दै एमाले अध्यक्ष ओलीले सरकारलाई दिएको समर्थन बुधबार फिर्ता लिएका थिए । संविधानत् सरकारमा सहभागी दलले समर्थन फिर्ता लिएको ३० दिनभित्र विश्वासको मत लिनुपर्छ ।

२७५ सदस्यीय प्रतिनिधिसभामा बहुमतका लागि १३८ मत चाहिन्छ । प्रचण्डसँग माओवादीका ३२, रास्वपाका २१, एकीकृत समाजवादीका१० र अशोक राई नेतृत्वको जसपाका ७ सहित ७९ सांसदको साथ छ ।