सत्ता समीकरण : लुम्बिनी र सुदूरपश्चितबाट फिर्ता भयो एमाले, बागमतीबाट बाहिरिँदै

काठमाडाैँ । केन्द्रमा नेपाली कांग्रेस र नेकपा एमालेले सरकार सञ्चालन गर्ने सहमति गरेपछि तीन प्रदेश सरकार अल्पमतमा परेकाे छ । माओवादी केन्द्रले नेतृत्व गरेकाे लुम्बिनी र बागमती प्रदेश र नेकपा एकिकृत समाजवादीले नेतृत्व गरेकाे सुदूरपश्चित प्रदेश सरकार अल्पमतमा परेकाे हाे ।

केन्द्रमा नयाँ समीकरण बनेपछि नेकपा एमालेले लुम्बिनी प्रदेश सरकारलाई दिएको समर्थन फिर्ता लिएको छ । बिहीबार एमालेका ५ मन्त्रीले मुख्यमन्त्री जोखबहादुर महरालाई राजीनामा पनि बुझाएको छ । बागमती प्रदेशबाट आज बाहिरिने एमालेको तयारी छ ।

केन्द्रीय सत्ता समीकरणमा फेरबदल आएसँगै नेकपा माओवादी केन्द्रले नेतृत्व गरिरहेको बागमतीमा एमालेले समर्थन फिर्ता लिन लागेको संसदीय दलका नेता तथा आर्थिक मामिला तथा योजनामन्त्री जगन्नाथ थपलियाले जानकारी दिए । बागमतीमा एमालेबाट पाँच जना मन्त्री छन् ।

नेकपा एकिकृत समाजवादी पार्टी नेतृत्वको सुदूरपश्चिम सरकार पनि अल्पमतमा परेको छ । नेकपा एमालेले सुदूरपश्चिम प्रदेश सरकारलाई दिएको समर्थन फिर्ता लिएपछि दीर्घबहादुर सोडारी नेतृत्वको सरकार अल्पमतमा परेको छ ।

नेकपा एमाले नेतृत्वकाे काेशी, कर्णाली प्रदेश र नेपाली कांग्रेस नेतृत्वकाे गण्डकी प्रदेश सुरक्षित छ । मधेश प्रदेश सरकारकाे नेतृत्व जनमत पार्टीले गरेकाे छ ।  जनमत पनि कांग्रेस एमाले नेतृत्वकाे गठबन्धनमा रहने भएका कारण सरकार जाेगिने लगभग निश्चित छ ।