विराटनगरबाट १६९ किलो गाँजा बरामद

विराटनगर । विराटनगरको सीमावर्ती क्षेत्रमा १६९ किलो गाँजा फेला परेको छ । प्रहरीका अनुसार नेपाल–भारत सीमा क्षेत्रनजिक विराटनगर महानगरपालिका–१७ गुजार टोलस्थित खाली जमिनमा १ सय ६९ किलो गाँजा फेला परेको हो ।

गाँजा जिल्ला प्रहरी कार्यालय मोरङ र इलाका प्रहरी कार्यालय रानीबाट खटिएको संयुक्त टोलीले बिहीबार राति ११ बजेतिर फेला पारेको हो ।

मोरङ प्रहरीका प्रवक्ता डीएसपी ज्ञानेन्द्रबहादुर बस्नेतका अनुसार गाँजा कसले ल्याएर छाड्यो भन्ने खुलेको छैन । तस्करको समूहले भारत तर्फ लैजादै गर्दा प्रहरीलाई देखेपछि बाटोमै गाँजा छाडेर भागेको प्रहरीको भनाई छ । ६ वटा पोकाभित्र गाँजा भेटिएको थियो ।

नेपालबाट भारततर्फ कटाउने तयारी गर्दैगर्दा प्रहरी आएको थाहा पाएका कारण ओसारपसारमा संलग्नहरु गाँजा फालेर भागेको हुनसक्ने आशंका गरिएको छ ।