प्रचण्डले प्रधानमन्त्रीबाट राजीनामा नदिने, विश्वासको मत परीक्षण गर्ने

काठमाडौं । नेकपा माओवादी केन्द्रको पदाधिकारी बैठकले प्रधानमन्त्रीबाट पुष्पकमल दाहाल ‘प्रचण्ड’ले राजीनामा नदिने निर्णय गरेको छ ।

बालुवाटारमा बसेको पदाधिकारी बैठकले राजीनामा नदिने र विश्वासको मतको सामना गर्ने निर्णय गरेको सचिव देवेन्द्र पाैडेलले जानकारी दिए ।

कांग्रेस एमालेले सोमबार राति नयाँ सरकार बनाउने सहमति गरेका थिए ।

सहमतिपछि आज विहान प्रधानमन्त्री प्रचण्डलाई भेटेर एमाले अध्यक्ष केपी शर्मा ओलीले राजीनामा दिएर आफ्नो नेतृत्वमा बन्ने सरकारलाई समर्थन गर्न आग्रह गरेका थिए । तर प्रचण्ड तयार भएनन् ।

दुई पार्टीले सहमति गरेपछि राष्ट्रिय सहमतिको सरकार बनाऔं भनेर प्रस्ताव गरेकाे भन्दै प्रचण्डले जान नसकिने पदाधिकारी बैठकमा व्रिफिङ गरेका थिए ।

प्रचण्ड संविधानको धारा ७६ को उपधारा २ अनुसार सरकारको नेतृत्वमा छन् । उनले विश्वासको मत नपाए स्वत उपधारा ३ अनुसार सरकार बन्नेछ । उपधारा ३ अनुसार संसदको ठूलो दलको नेता प्रधानमन्त्री नियुक्त हुने प्रवधान छ । संघिय संसदको ठूलो दल नेपाली कांग्रेस हो । कांग्रेस र एमालेबीच पहिलो कार्यकाल एमाले अध्यक्ष केपी शर्मा ओली प्रधानमन्त्री बन्ने समझदारी छ ।

वर्तमान प्रधानमन्त्री प्रचण्डले राजीनामा नदिने छनक बुझेका एमाले र कांग्रेस नेताहरुले सोमबार राति राष्ट्रपति रामचन्द्र पौडेललाई भेटेर प्रचण्डले विश्वासको मत परिक्षणपछि पनि उपधारा २ अनुसार नै सरकार गठन आख्ह्वान गर्नका लागि आग्रह गरेका थिए ।

सरकारमा सहभागि दलले समर्थन फिर्ता लिए प्रचण्डले ३० दिन भित्र विश्वासको मत परीक्षण गर्नुपर्छ ।