कांग्रेस-एमालेबीच सरकार गठनको सहमति, किनारामा प्रचण्ड

विराटनगर । संसदका दुई ठूला दल नेपाली कांग्रेस र नेकपा एमालेले सरकार बनाउने सहमति गरेका छन् ।

नेकपा माओवादी केन्द्रसँगको गत फागुन तेस्रो साता भएको सहमति तोड्दै एमाले अध्यक्ष केपी शर्मा ओलीले कांग्रेससँग सत्ता सहकार्यको सहमति गरेका हुन् । सहमतिपछि अब ओली पहिलो कार्यकाल प्रधानमन्त्री बन्नेछन्, दोस्रो कार्यकाल कांग्रेस सभापति शेरबहादुर देउवा प्रधानमन्त्री बन्नेछन् ।

ठूला दल कांग्रेस एमालेको नयाँ समीकरण बनेपछि प्रधानमन्त्री प्रचण्ड किनारामा पुगेका छन् । ३२ सिट संख्या भएपनि कांग्रेस र एमालेसँग सहकार्य गर्दै प्रधानमन्त्री बनिरहेका प्रचण्ड सत्ताकाे किनारामा पुग्ने भएका हुन् ।

कांग्रेस एमालेबीचको सहमतिमा दुई दलको सरकार बनेपछि निर्वाचन प्रणालीमा सुधार गर्ने लगायतका विषयमा संविधान संशोधन गर्ने सहमति छ ।

संविधानमा आवश्यक संशोधन गर्न पूर्वप्रधानन्यायाधीश कल्याण श्रेष्ठको नेतृत्वमा संविधान संशोधन सुझाव समिति बनाउने सहमति पनि छ ।