उपसभामुखको गुनासो,‘सांसदहरु बैठकमै निदाउनुहुन्छ’

काठमाडौं । संघीय संसदकी उपसभामुख इन्दिरा रानाले संसद् बैठकमा सांसदहरु निदाउने गरेको गुनासो गरेकी छन् । आइतबार संसद् भवनमा ६६ औं संसद् दिवसको अवसरमा आयोजित कार्यक्रममा बोल्दै उनले संसद् बैठकका बेला सांसदहरु घुर्दै निदाउने गरेको बताएकी हुन् ।

‘संसद्‌मा फोटो खिच्न मिल्दैन, घ्वार्रघ्वार्र घुरेर सुतिरहेको हुनुहुन्छ माननीयज्यूहरु, यहाँ मलाई के भन्न मन लाग्यो भने यहाँ पनि धेरै सुतेको देखें,’ उनले भनिन् ,‘अलिअलि रेकर्ड पनि गरेर राखेको छु मैले । यो सुत्ने तरिकाले चाहिं हामी सभामा नबसौं ।’

उपसभामुख रानाले संसद् बैठकमा सुतेर सपना नदेख्न सांसदहरुलाई सचेत गराइन् । ‘सुत्ने बेला भएको छैन, सुतेर सपना नदेख्नुस् । उठेर हेर्नुस् त कति सुन्दर छ,’ उनले भनिन् ,‘यी अनुहारहरु फेरि एकछिनमा हामी देख्न पाउँदैनौं । यी आवाजहरु एकछिनमा हामी सुन्न पाउँदैनौं ।’