धनपालथानबाट १५ सय किलाे गाँजा बरामद

विराटनगर । भारत लैजानका लागि सीमा क्षेत्र नजिकै लुकाएर राखेको एक हजार ५ सय ४८ किलो गाँजा मोरङ प्रहरीले बरामद गरेको छ । बिहीबार धनपालथान गाउँपालिका–७ का राजकुमार सिंहको खेतमा रहेको गोठबाट १ हजार ५ सय ४८ किलो गाँजा बरामद गरेको हो ।

गाँजा बरामद भएको स्थान नेपाल भारत सीमा नजिकै रहेको मोरङ प्रहरी प्रमुख प्रहरी उपरीक्षक नवराज कार्कीले जानकारी दिए ।

गोठमा लुकाएर राखेको अवस्थामा ४९ वटा बोराभित्र प्याक गरेर राखेको अवस्थामा गाँजा फेला परेको उनले बताए । प्रहरीले गोठधनी सिंहलाई पनि नियन्त्रणमा लिएको छ । भण्डारण गरिएको गोठ बस्ती नजिकै पर्छ ।

प्रहरी स्रोतका अनुसार बरामद भएको गाँजा भारत लैजानका लागि धनकुटाबाट पटकपटक गरि तस्करको समूहले ल्याएको थियो ।

धनकुटाको गाँजा विराटनगरमा प्रतिकिलो करिब १५ हजार रूपैयाँमा किनबेच हुन्छ ।भारत पुगेपछि गाँजाको मूल्य दोब्बर हुन्छ । बरामद गाँजाको मूल्य नेपालमा २ करोड ३२ लाख हाराहारी रहेको प्रहरीले बताएको छ ।

(यसअघि समाचार शीर्षक भूलवस गलत भएकाेमा सच्याइएकाे छ । स‍.)