रंगेलीमा सर्पले डस्दा एक जनाको मृत्यु

विराटनगर । मोरङको रंगेलीमा विषालु सर्पले डसेर एक जना महिलाको मृत्यु भएको छ । रंगेली नगरपालिका–८ खयरबारीकी ५७ वर्षीया कलादेवी ऋषिदेवको मृत्यु भएको हो ।

प्रहरीका अनुसार राति सुतिरहेको ओछ्यानमा सर्पले डसेको थाहा पाएपछि परिवारका सदस्यले उपचारका लागि भारततर्फ लगेका थिए ।

उपचारका लागि लैजाने क्रममा बाटैमा उनको मृत्यु भएको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले बताए ।

बस्नेतका अनुसार महिलालाई कुन प्रजातिको सर्पले डसेको हो भन्ने खुल्न सकेको छैन । घटनाका बारेमा प्रहरीले बिहीबार बिहान साढे ६ बजेतिर मात्रै जानकारी पाएको थियो ।