एसईईमा १ लाख १५ हजार विद्यार्थीले पूरक परीक्षा दिन पाउने

विराटनगर । एसईईमा दुई विषयमा नन ग्रेडिङ (एनजी) ल्याएका विद्यार्थीले एक महिनापछि पूरक परीक्षा दिन पाउने भएका छन् ।

राष्ट्रिय परीक्षा बोर्डका अनुसार परीक्षामा सहभागि मध्ये ननग्रेडिङ (एनजी) हुने विद्यार्थीको संख्या २ लाख ४२ हजार ३ सय १३ छ ।

तीमध्ये २ विषयमा एनजी हुने १ लाख १५ हजार ८ सय ३४ विद्यार्थीले पूरक परीक्षा दिन पाउनेछन् । उनीहरू यही साउन १८ र १९ गते हुने ग्रेडवृद्धि परीक्षामा सहभागी हुन पाउने छन् ।

ग्रेडवृद्धि हुने विद्यार्थी यसै शैक्षिक सत्रमा कक्षा ११ मा पढ्न पाउनेछन् । २ भन्दा बढी विषयमा ननग्रेडिङमा पर्ने १ लाख २६ हजार ४ सय ७९ विद्यार्थीले भने आउँदो वार्षिक परीक्षामा सहभागी हनुपर्नेछ।

बिहीबार बिहान राष्ट्रिय परीक्षा बोर्ड, परीक्षा नियन्त्रण कार्यालयले एसईईको नतिजा सार्वजनिक गरेको हो। परीक्षामा सहभागी कुल विद्यार्थीमध्ये ४७.८६ प्रतिशत विद्यार्थी मात्रै उत्तिर्ण भएका छन् ।