विराटनगरको बजेट साढे तीन अर्ब

विराटनगर । आर्थिक वर्ष २०८१–८२ का लागि विराटनगर महानगरपालिकाले ३ अर्ब ४९ करोड ९८ लाख रुपैयाँको बजेट ल्याएको छ । चालू आर्थिक वर्षका लागि विराटनगरले ३ अर्ब ३६ करोड १७ लाखको बजेट ल्याएको थियो । सोमबार उपमेयर शिल्पा कार्कीले ३ अर्ब ४९ करोड ९८ लाख ८६ हजारको बजेट प्रस्तुत गरेकी हुन् ।

आगामी आर्थिक वर्ष महानगरको बजेटमा प्रशासनिक खर्च तर्फ ५९ करोड, ऋणको सावा ब्याज भुक्तानीका लागि ५ करोड, चालु आर्थिक वर्षको दायित्व भुक्तानीका लागि ३ करोड ३४ लाख ८३ हजार खर्च हुने अनुमान छ । समपूरक कार्यक्रममा ६ करोड, वडास्तरीय योजनाका लागि ४३ करोड ३ लाख १२ हजार बजेट विनियोजन बिनियोजन भएको छ । योजना निर्माण गर्ने क्रममा महानगरपालिकाले १९ वडालाई न्यूनतम दुई करोडका दरले बजेट दिएको थियो ।

आगामी वर्षको खर्च तर्फ बहुवर्षीय ठेक्का तथा दायित्व सरेका योजनाहरुको भुक्तानीका लागि ५० करोड, बस्ती विकास र तराइ मधेस समृद्धि कार्यक्रम तर्फ ५ करोड ६० लाख, मर्मत सम्भारका लागि १० करोड र भारी सवारी साधन खरिदका लागि २ करोड बजेट विनियोजन गरेको छ ।

महानगरपालिकाले सडक ढल तथा नाला सफाई र मर्मतका लागि ४ करोड ५० लाख विनियोजन गरेको छ । सामाजिक विकास क्षेत्र अन्तर्गत शैक्षिक विकास कार्यक्रमका लागि ७८ करोड, स्वास्थ्य विकास कार्यक्रमका लागि २० करोड ५७ लाख, नगरस्तीय योजनाका लागि ३५ करोड विनियोजन गरेको छ ।

कृषि विकासका लागि १ करोड ३ लाख, पशुपंक्षी तथा भेटनरीका लागि १ करोड ५३ लाख, उद्यमशील विकासका लागि ५० लाख, पर्यटन प्रवद्र्धनका लागि १ करोड ९४ लाख विनियोजन गरेको छ । विपद् व्यवस्थापन तर्फ १ करोड २०, सरसफाइका लागि १ करोड ३० लाख विनियोजन गरेको छ ।

चालु आर्थिक वर्षका लागि ३ अर्ब ३६ करोड १७ लाख बजेट प्रस्तुत गरेको महानगरले जेठ मसान्तसम्म २ अर्ब १५ करोड ६० लाख खर्च गरेको छ । यो विनियोजित बजेटको ६४.१३ प्रतिशत हो । सो खर्च मध्ये चालु तर्फ १ अर्ब २५ करोड ११ लाख र पूजीगत तर्फ ८८ करोड १३ लाख ६६ हजार रुपैयाँ खर्च भएको छ ।