जीवन विकासको वार्षिकोत्सवमा १५१ स्थानमा सामाजिक काम

विराटनगर । ग्रामीण तथा सहरी क्षेत्रका विपन्न महिलाहरूलाई आर्थिक रूपमा सबल बनाउँदै आएको जीवन विकास लघुवित्त वित्तीय संस्थाले आफ्नो ७ औं वार्षिकोत्सवको अवसरमा विभिन्न स्थानमा सामाजिक कार्यक्रम गरेको छ ।

घरदैलोमा पुगेर वित्तीय कारोवारसँगै सामाजिक सचेतना, वातावरण संरक्षण र शिक्षाको क्षेत्रमा काम गर्दै आएको जीवन विकासले शनिबार १५१ स्थानमा विभिन्न कार्यक्रम गरी वार्षिकोत्सव मनाएको हो ।

संस्थाले विभिन्न १० क्षेत्रमा १५१ वटा सामाजिक क्रियाकलाप सञ्चालन गरेको संस्थाका प्रमुख कार्यकारी अधिकृत संजयकुमार मण्डलले जानकारी दिए । संस्थाले आयोजना गरेको कार्यक्रममा लघुवित्तका कर्मचारी, विद्यार्थी, शिक्षक तथा समाजिक क्षेत्रका अगुवाहरुको सहभागिता थियो ।

जीवन विकासले ३० स्थानमा बजार सरसफाई र डस्टबिन सहयोग गरेको छ । ७६ स्थानमा विभिन्न मन्दिरहरूको सरसफाई, वृक्षारोपण र डस्टबिन वितरण कार्यक्रम गरेको छ ।

शिक्षा क्षेत्रलाई प्राथमिकता दिँदै आएको संस्थाले ४ स्थानमा विद्यालय सरसफाई र वृक्षारोपणसँगै विद्यार्थीहरूको बौद्धिक विकासका लागि हाजिरी जवाफ प्रतियोगिता आयोजना गरेको छ । ७ स्थानका विद्यालयमा सरसफाई तथा वृक्षारोपण कार्यक्रम आयोजना गरेको छ ।

विद्यालय सरसफाई तथा हाजिरीजवाफ प्रतियोगिता १५ स्थानमा आयोजना गरेको छ । थप तीन स्थानमा विद्यालय सरसफाईसँगै शैक्षिक सामग्री वितरण गरेको छ । १० विपन्न परिवारको आवास निर्माण गरिदिएको छ ।

जीवन विकासले वित्तीय सेवासँगै सामाजिक सेवालाई संस्थाको अभिन्न अङ्ग बनाएर काम गरिरहेको संस्थाका प्रमुख कार्यकारी अधिकृत मण्डलले जानकारी दिए । ‘हामी ऋण लगानी र बचतमा मात्र सीमित छैनौं । घरदैलोमा पुगेर वित्तीय सेवासँगै सामाजिक सचेतना, वातावरण संरक्षण र शिक्षाको क्षेत्रमा काम गरिरहेका छौं,’ उनले भने,‘ सोही अभियानको निरन्तरता वार्षिकोत्सवमा दियौं ।’

जीवन विकासमा नेपालभरीका ३ लाख ५० हजारभन्दा बढी महिला सदस्यहरू जोडिएर नियमित आर्थिक कारोबार गरिरहेका छन् ।