धरानमा विमानस्थलका लागि रोक्का जग्गा फुकुवा

सुनसरी । धरान उपमहानगरपालिका-१७, डाँडाघोपामा प्रस्तावित विमानस्थलका नाममा साढे दुई वर्षदेखि रोक्का गरिएको जग्गा फुकुवा भएको छ ।

निवर्तमान नगर प्रमुख हर्कराज साम्पाङ राईले २०८० भदौ ११ गते एयरपोर्ट निर्माण गर्ने भन्दै ५ सयभन्दा बढी घरपरिवारको जग्गा बिक्री-वितरण र सिफारिसमा रोक लगाएका थिए । एयरपोर्ट नबन्ने निश्चित हुँदा पनि जग्गा फुकुवा नभएपछि स्थानीय बासिन्दा मर्कामा परेका थिए ।

साम्पाङले पदबाट राजीनामा दिएर प्रतिनिधिसभा सदस्यकाे निर्वाचनमा हाेमिएपछि कार्यवाहक मेयरको जिम्मेवारी सम्हालेका अइन्द्रविक्रम बेघाले स्थानीयको माग सम्बोधन गर्दै जग्गा फुकुवा गर्ने निर्णय गरेका हुन् ।

मंगलबारदेखि नै लागू हुने गरी ‘यति इन्कर्पोरेट’को नाममा रहेको ६ बिघा जग्गाबाहेक अन्य सबै सर्वसाधारणको जग्गा फुकुवा गरिएको हो ।

कार्यवाहक मेयर बेघाले जग्गा फुकुवाको आधिकारिक पत्र वडा कार्यालय, मालपोत र नापी कार्यालयमा पठाइसकिएको जानकारी दिए ।