आगामी वर्षलाई भ्रमण वर्ष घोषणा गर्दै कोशी सरकार

विराटनगर । कोशी प्रदेश सरकारले आगामी वर्ष २०८२ साललाई ‘पर्यटन वर्ष’ काे रुपमा मनाउने भएकाे छ । सेप्टेम्बर २७ अर्थात विश्व पर्यटन दिवसको अवसर पारेर आज सरकारले ‘कोशी प्रदेश पर्यटन वर्ष २०८२’ घोषणा गर्दैछ ।

सरकारले आगामी पर्यटन वर्ष २०८२ लाई ‘डिलाइटफुल कोशी’ अर्थात ‘रमणीय कोशी’ भन्ने नाराका साथ मनाउने बताएको छ । ‘८२ का लागि ८२’ पर्यटकीय गन्तब्यको सूची पनि सार्वजनिक गर्नेछ । 

कोशी प्रदेशका मुख्यमन्त्री हिक्मतकुमार कार्कीले चालु आर्थिक वर्षको वार्षिक नीति तथा कार्यक्रम र बजेटमार्फत उच्च प्राथमिकतामा  ‘कोशी प्रदेश पर्यटन वर्ष २०८२’ राखेका थिए ।

मुख्यमन्त्री कार्कीले शुक्रबार विश्व पर्यटन दिवसको अवसरमा शुभकामना दिंदै भौगोलिक, सामाजिक, सांस्कृतिक तथा जैविक विविधताले भरिपूर्ण कोशी प्रदेश पर्यटकीय दृष्टिकोणले अत्यन्तै उर्वर रहेको बताए ।

उनले नेपालकै होचो क्षेत्र झापाको केचनाकबलदेखि विश्वको सर्वोच्च शिखर सगरमाथासहित १० अग्ला हिमालमध्ये ५ वटा कोशी प्रदेशमा रहनुले पनि कोशी प्रदेशको सम्भावना उच्च रहेको उनले बताए ।